Google မှ ဦးဆောင်ထုတ်လုပ်မယ့် Google Pixel 2 အတွက် Specification တွေပေါက်ကြား ခဲ့ပြီးတဲ့နောက် အခုအခါ Google Pixel XL 2 ရဲ့ ဒီဇိုင်းပုံစံကို တွေ့မြင်ရမှာဖြစ်ပါတယ်။ အရင်ဆောင်းပါးမှာဖော်ပြခဲ့တဲ့ Codename “Taimen” ဟာ ဒီ Google Pixel XL 2 ဖြစ်လောက်မယ်လို့လည်းသိရှိရပါတယ်။ 

                တခြား Codename တွေဖြစ်တဲ့ “Walleye” နဲ့ “Muskie” ဟာ ပြုလုပ်နေဆဲဖြစ်ပြီး ဘယ် Codename က Google Pixel 2 ဖြစ်လာမလဲဆိုတာကို အတိအကျမသိရှိရသေးပါဘူး။ အရင်ကြားသိခဲ့ရတဲ့ သတင်းတစ်ခုအရ Google Pixel 2 XL ကို HTC (Pixel နဲ့ Pixel XL ကိုထုတ်လုပ်ပေးခဲ့တဲ့ကုမ္ပဏီ) အစား LG မှထုတ်လုပ်ပေးမယ် လို့လည်းသိရှိရပါသေးတယ်။

                LG မှထုတ်လုပ်ပေးမယ်ဆိုတဲ့အချက်တွေဟာလည်း သိသာထင်ရှားပါတယ်။ LG မှ OLED Panel ကိုအသုံးပြုမှာဖြစ်ပြီး 18:9 Aspect Ratio နဲ့အတူ LG G6 အတိုင်း ဖုန်းရဲ့ထောင့်လေးတွေဟာ ကွေးကောက်နေမှာဖြစ်ပါတယ်။ ဒါ့အပြင် OLED Panel ကတော့ ကွေးကောက်မှုမရှိပေမဲ့ ဖန်သားပြင်ကိုတော့ အနည်းငယ်ကွေးနေတဲ့ပုံစံထည့်သွင်းပေးထားမှာဖြစ်ပြီး မျက်နှာပြင်အကျယ်အ၀န်း ၆ လက်မရှိမယ်လို့ဆိုပါတယ်။

                ထုတ်လုပ်ပေးမယ့်နည်းပညာကုမ္ပဏီသာ ပြောင်းလဲသွားပေမယ့်လည်း LG ဟာ Pixel XL 2 မှာ ညှစ်လို့ရတဲ့ ဘေးဘောင်တွေကို ထည့်သွင်းပေးထားမယ်လို့ဆိုပါတယ်။ ဒီလိုထည့်သွင်းပေးထားပေမယ့်လည်း HTC U11 က ညှစ်လို့ရတဲ့ဘေးဘောင်ပုံစံမျိုးမဟုတ်ဘူးလို့လည်း သိရှိရပါတယ်။ ဖုန်းရဲ့ဘေးဘောင်တွေဟာလည်း ကျဉ်းမြောင်းသွားမှာဖြစ်ပြီး LG G6 ကအတိုင်း FullVision Display လိုမျိုးဖြစ်လာမလားဆိုတာတော့ အတိအကျမသိရှိရသေးပါဘူး။

                Google Pixel 2 နဲ့ Pixel XL 2 တို့ကို မနှစ်ကအတိုင်း သြဂုတ်/အောက်တိုဘာလ လောက်မှာမိတ်ဆက်ပေးမှာဖြစ်လို့ Google Pixel ကြိုက်နှစ်သက်သူများအတွက် နှစ်လကျော်လောက် စောင့်ဆိုင်းရဦးမှာဖြစ်ပါတယ်။