နည်းပညာကုမ္ပဏီကြီး တစ်ခုဖြစ်တဲ့ Google အနေနဲ့ Android Oreo (Go Edition) နဲ့ Go Edition Apps တွေကို မိတ်ဆက်ပေးပြီးထဲက ငြိမ်သက်နေခဲ့တာ တော်တော်ကြာခဲ့ပါပြီ။ ဒါပေမယ့် ဒီနေ့မှာတော့ Nokia နဲ့ ပူးပေါင်းပြီး ပထမဆုံး Android Go ဖုန်း Nokia 1 ကို ထုတ်လုပ်တော့မှာဖြစ်ပြီး နောက်နှစ်မေလထဲမှာ မိတ်ဆက်သွားနိုင်ခြေရှိတယ်လို့ ကောလာဟလ သတင်းတစ်ခု ထွက်လာပါတယ်။ နောက်ပြီး Nokia 1 ကိုဖွဲ့ဖြိုးဆဲ နိုင်ငံတွေအတွက် ရည်ရွယ်ပြီး ထုတ်လုပ်သွားမှာ ဖြစ်တယ်လို့ သိရပါတယ်။

                နာမည်ကြီး Tipster တစ်ယောက်ဖြစ်တဲ့ ရုရှားနိုင်ငံသား Elder Murtazin ကတော့ Nokia 1 ဟာ Google ရဲ့ Android Oreo (Go Edition) Program ထဲမှာ ပါတယ်လို့ သူ့ရဲ့ Twitter Account မှာ Tweet လုပ်ခဲ့ပါတယ်။ ဒါ့အပြင် သူ့ Tweet ထဲမှာ Nokia 1 နဲ့ ပက်သတ်တဲ့ Specification တွေကိုလည်း ချပြသွားပါသေးတယ်။ အသစ် ထွက်ရှိလာမယ့် Nokia စမတ်ဖုန်းမှာ HD(720 x 1280 pixels) IPS Display ကို အသုံးပြုသွားမှာ ဖြစ်ပြီး 1 GB RAM နဲ့ Internal Storage 8 GB ပါ၀င်မှာ ဖြစ်သလို စျေးနှုန်းအနေနဲ့ Nokia 1 ကို ခန့်မှန်းခြေ ကန်ဒေါ်လာ ၁၀၀ (မြန်မာငွေ ၁သိန်း ၄သောင်း ၀န်းကျင်) နဲ့ ရောင်းချသွားမယ်လို့လည်း Murtazin က ပြောထားပါတယ်။

Nokia 1 - Android Go, 5990. HD, IPS, 1/8gb - пристойный корпус. Март. Пока сырой. У Хуавея такой же и цена 4990 или 5490, еще не решено

— Eldar Murtazin (@eldarmurtazin) December 26, 2017

                Nokia 1 မှာ Android Oreo (Go Edition) ကို အသုံးပြုသွားမှာဖြစ်ပြီး Google ရဲ့ Lightweight Apps တွေဖြစ်တဲ့ Files Go, Google Maps Go, YouTube Go တို့ ပါ၀င်လောက်တယ် လို့လည်း ကောလာဟလတွေ ထွက်ပေါ် နေပါတယ်။ HMD Global က Nokia 1 ကို ထုတ်လုပ်မှာဖြစ်သလို Huawei ကလည်း Android Go ဖုန်း ထုတ်လုပ်ဦးမှာ ဖြစ်တယ်လို့ Murtazin က ပြောထားပါသေးတယ်။ ဒါပေမယ့် Huawei က ထုတ်မယ့် Android Go ဖုန်းရဲ့ Specifications တွေနဲ့ ပက်သက်လို့တော့ Murtazin က မပြောထားပါဘူး။

                အခုလောလောဆယ်မှာတော့ Nokia 1 ဟာ ကောလဟာလ သတင်းတစ်ခု အနေနဲ့ပဲ ရှိပါသေးတယ်။ များမကြာမီ ကာလထဲမှာတော့ Nokia 1 နဲ့ ပက်သက်တဲ့ ခိုင်ခိုင်မာမာ သတင်းတစ်ခု ထွက်ပေါ်လာမယ်လို့ ခန့်မှန်းရပါတယ်။

This Article is contributed by Phyo Kyaw Swar.