Apple ထုတ်လုပ်ရောင်းချ ခဲ့သမျှ iPhone မျိုးဆက်တွေထဲမှာ ဈေးအကြီးဆုံး iPhone လို့ သတ်မှတ်လို့ရတဲ့ iPhone X ရဲ့ ထုတ်လုပ်မှု ကုန်ကျစရိတ် စုစုပေါင်းဟာ ကန်ဒေါ်လာ ၃၅၇ သာရှိတယ်လို့ Reuters က ဆိုပါတယ်။ ဒါပေမယ့် Reuters က Report မှာတော့ iPhone X မှာ ပါဝင်တဲ့ ဘယ်အစိတ်အပိုင်းက ထုတ်လုပ်မှု ကုန်ကျစရိတ် ဘယ်လောက် ရှိတယ်ဆိုတာ တိတိကျကျ မသိရပါဘူး။

                ဒီနေ့မှာတော့ TechInsights ဆိုတဲ့ သုတေသန ကုမ္ပဏီတစ်ခုကနေ ထုတ်ပြန်ထားတဲ့ Report အရ iPhone X မှာ ပါဝင်တဲ့ ဘယ်အစိတ်အပိုင်းက ထုတ်လုပ်မှု ကုန်ကျစရိတ် ဘယ်လောက် ရှိတယ်ဆိုတာကို တိတိကျကျ သိရပြီ ဖြစ်ပါတယ်။

                iPhone X မှာ ပါဝင်လာတဲ့ စက်ပစ္စည်း အစိတ်အပိုင်းတွေထဲမှာ OLED Display က ထုတ်လုပ်မှု ကုန်ကျစရိတ် အမြင့်ဆုံးဖြစ်ပြီး ကန်ဒေါ်လာ ၆၅ ကျသင့်တယ်လို့ သိရပါတယ်။ ထူးတော့ မထူးဆန်းပါဘူး။ iPhone X ရောင်းရသလောက် Samsung ကတော့ OLED Display တွေ ထုတ်ပေးရတာနဲ့တင် အကျိုးအမြတ်တွေ ရရှိနေဦးမှာ ဆိုကတည်းကိုက OLED Display က ထုတ်လုပ်မှု ကုန်ကျစရိတ် အမြင့်ဆုံးပဲလို့ ခန့်မှန်းလို့ ရနေပါပြီ။

                ထုတ်လုပ်မှု ကုန်ကျစရိတ်တင် များနေတာ မဟုတ်ပါဘူး၊ Screen လဲမယ်ဆိုရင်လည်း ကန်ဒေါ်လာ ၂၇၉ ကျသင့်ဦးမှာပါ။ နောက်ထပ် ထုတ်လုပ်မှု ကုန်ကျစရိတ်မြင့်တဲ့ အစိတ်အပိုင်းကတော့ iPhone X ရဲ့ Stainless Steel Chassis ပဲ ဖြစ်ပြီး ကန်ဒေါ်လာ ၃၆ ဒေါ်လာ ကျသင့်တယ်လို့ သိရပါတယ်။ 

                ဘယ်စက်ပစ္စည်း အစိတ်ပိုင်းက ထုတ်လုပ်မှုပိုင်းမှာ ကုန်ကျစရိတ်ကြီးတယ်လို့ ပြောနေပါစေဦး စုစုပေါင်းက ကန်ဒေါ်လာ ၃၅၇ ပဲ ရှိတာဆိုတော့ Apple အနေနဲ့ အမြတ်ကို ၆၄% အထိ တင်ထားတယ်ဆိုတာ ငြင်းလို့တော့ မရပါဘူး။ iPhone 8 လည်း အလားတူပါပဲ။ အမြတ်ကို ၅၉% အထိ တင်ထားတာကို တွေ့ရပါတယ်။

                Apple CEO Tim Cook ကြီးကတော့ အမြတ်ကို ၆၄% အထိ တင်ထားရတာနဲ့ ပက်သက်ပြီး

                “Apple အနေနဲ့ အသုံးပြုသူတွေ ဆီကနေ အကျိုးအမြတ်ကို မရ၊ ရအောင် ညှစ်ယူမယ်ဆိုတဲ့ စိတ်ထားမျိုးတဲ့ iPhone X ရောင်းဈေးကို တင်ထားတာ မဟုတ်ပါဘူး။ iPhone X ကနေ ပေးနိုင်တဲ့ နည်းပညာတွေကြောင့် ဈေးကိုတင်ထားတာ ဖြစ်ပါတယ်”

လို့ ဖြေကြားခဲ့ပါတယ်။

                အမြတ်တင်တယ်ဆိုတဲ့ နေရာမှာ Apple ကပဲ အမြတ်တင်နေတာတော့ မဟုတ်ပါဘူး။ နည်းပညာကုမ္ပဏီကြီးတွေ ထုံးစံအတိုင်း နည်းပညာကို ရောင်းစားတာပဲ ဖြစ်ပါတယ်။ Hardware ထုတ်လုပ်မှုပိုင်းမှာ ဘယ်လောက်ပဲ ကုန်ကျစရိတ်ရှိရှိ ဘယ် Electronic ပစ္စည်းမဆို ရောင်းဈေးကတော့ ထုတ်လုပ်မှု ကုန်ကျစရိတ်ထက် များနေမှာပဲ ဖြစ်ပါတယ်။