Apple အနေနဲ့ iPhone X ကို မနေ့ကပဲ တရားဝင် Pre-Order တွေ လက်ခံခဲ့ပါတယ်။ Pre-Order တွေ စတင်လက်ခံပြီ ဆိုတော့လည်း ဖုန်းပြင်ခဈေးနှုန်းတွေနဲ့ ပက်သက်ပြီးတော့လည်း ဈေးနှုန်းအတိအကျ သိရပြီ ဖြစ်ပါတယ်။ iPhone X ကတော့ သိကြတဲ့အတိုင်းပဲ ဖုန်းဈေးကိုက ကန်ဒေါ်လာ ၉၉၉ က အနည်းဆုံးဆိုတော့ ဈေးကတော့ ခေါင်ခိုက်ပြီးသားပေါ့။ ဖုန်းဈေးကလည်း ကြီးသလို Screen လဲခကလည်း ဈေးကြီးဦးမှာပါ။

                Warranty မရှိဘူး၊ Apple Care လည်း မဝယ်ထားပဲ Screen လဲချင်တယ်ဆိုရင် ကန်ဒေါ်လာ ၂၇၉ ဒေါ်လာတောင် ပေးချေရမှာ ဖြစ်ပါတယ်။ ဒီဈေးက iPhone 6 ရဲ့ Screen လဲမယ်ဆိုရင် ကျသင့်တဲ့ ကန်ဒေါ်လာ ၁၂၉ ထက် နှစ်ဆကျော်တောင် ဈေးပိုများပါတယ်။ iPhone 8 ရဲ့ Screen လဲမယ်ဆိုရင် ကျသင့်တဲ့ ကန်ဒေါ်လာ ၁၆၉ ထက်တော့ ၆၅ ရာခိုင်နှုန်းလောက် ဈေးပိုကြီးပါတယ်။

                နောက်ပြီး ကန်ဒေါ်လာ ၂၇၉ ကျသင့်မယ် ဆိုတာက Screen လဲတဲ့ ဈေးနှုန်းပဲ ရှိပါသေးတယ်။ မတော်တဆမှု တစ်ခုခုကြောင့် iPhone X ကို ပြန်ပြင်ချင်တယ်ဆိုရင် ကျသင့်မယ် ဈေးနှုန်းက ကန်ဒေါ်လာ ၅၄၉ တောင် ကျသင့်မှာဆိုတော့ iPhone X ဈေးနှုန်းရဲ့ တစ်ဝက်နီးပါးလောက် ရှိပါတယ်။ ဆိုတော့ကား မိမိလက်ထဲ iPhone X ရောက်လာပြီဆိုရင် လွတ်ကျတာတွေ၊ မတော်တဆမှုတွေ မဖြစ်အောင်တော့ ဂရုစိုက်ဖို့ လိုအပ်ပါလိမ့်မယ်။

                မိမိက ခဏ၊ ခဏ ဖုန်းလွတ်ကျတတ်တဲ့သူ ဖြစ်တာမို့လို့ Apple Care+ ဝယ်ယူချင်တယ်ဆိုရင်လည်း iPhone X အတွက်က ကန်ဒေါ်လာ ၁၉၉ ကျသင့်မှာ ဖြစ်ပါတယ်။ ဒါပေမယ့်လည်း တစ်ခုခုဖြစ်ခဲ့လို့ သွားပြင်မယ်ဆိုရင် Service Fees က ထပ်ပေးရဦးမှာ ဖြစ်ပါတယ်။ 

                Service Fees ကလည်း Apple Care+ ရှိတယ် ဆိုရင်တောင်မှပဲ Screen လဲမယ်ဆိုရင် ကန်ဒေါ်လာ ၉၉ ထပ်ပေးရဦးမှာ ဖြစ်ပါတယ်။ ဒီတော့ Apple Care+ ဝယ်ထားမယ် ဆိုရင်လည်းပဲ ဈေးကများနေပါသေးတယ်။ Screen လဲမယ်ဆိုရင် ပေးရတဲ့ ဈေးနှုန်းက အရမ်းများလွန်းနေတာကလည်း မဆန်းပါဘူး။ iPhone X မှာသုံးထားတဲ့ OLED Display ကို Samsung က ထုတ်ပေးရတာကိုး။ 

                နောက်ပြီး ဒီလို Display မျိုးတွေက Samsung က ထုတ်တာတွေပဲ အခုလက်ရှိ အချိန်ထိ ကမ္ဘာမှာအကောင်းဆုံး ဖြစ်နေတာ၊ iPhone X ရဲ့ Display မှာပါဝင်တဲ့ Notch (Face ID အတွက် Component တွေ၊ FaceTime Camera တို့ ထားတဲ့နေရာအတွက် ဖြတ်လိုက်ရတဲ့ အဝိုက်) ကြောင့် ထုတ်လုပ်မှုပိုင်းမှာ ရှုပ်ထွေးစေတာ၊ စတာတွေကြောင့် Screen လဲတဲ့ ဈေးနှုန်းက ဒီ့ထက်ပိုများလာဖို့ပဲရှိတယ်လို့ ကျွမ်းကျင်သူတွေက ခန့်မှန်းထားကြပါတယ်။