Samsung ပရိတ်သတ်တွေ စောင့်မျှော်နေတဲ့ Galaxy S8 ကတော့ ယခုလာမယ့်၊ မတ်လအတွင်းမှာတင် ထွက်ရှိလာဖွယ်ရှိနေပါတယ်။

                Samsung အနေနဲ့ S စီးရီးမော်ဒယ်အသစ် Galaxy S8 ဖုန်းကို အရွယ်အစားနှစ်မျိုးနဲ့ ထုတ်လုပ်ဖွယ်ရှိပြီး၊ ရိုးရိုး Galaxy S8 က ၅.၈ လက်မမျက်နှာပြင်အကျယ်ရှိမှာဖြစ်ကာ၊ S8+ ဆိုတဲ့မော်ဒယ်ကတော့ မျက်နှာပြင် ၆.၂ လက်မအထိရှိနိုင်ပါတယ်။

                တရားဝင်မထွက်ရှိသေးတဲ့ စမတ်ဖုန်းတွေကို အမြဲတမ်းဖော်ထုတ်ပြလေ့ရှိတဲ့ နာမည်ကြီးဘလော့ဂါ Evan Blass ရဲ့ တွစ်တာပို့စ်အရ Samsung Galaxy S8+ မှာပါမယ့် Specifications အသေးစိတ်နီးပါးကို တွေ့ရှိခဲ့ရပြီး၊ စိတ်ဝင်စားဖို့အကောင်းဆုံးတစ်ခုက မျက်နှာပြင်အကျယ် ၆.၂ လက်မဆိုတာပါ။ Evan Blass ဟာ စမတ်ဖုန်းသတင်းဦးသတင်းဖျားတွေနဲ့ ပတ်သတ်လာရင် အမြဲမှန်လေ့ရှိသူတစ်ယောက်ဖြစ်တာကြောင့် ဒီ Specs တွေက တကယ်ဖြစ်လောက်ပါတယ်။

                Galaxy S8+ မှာ မျက်နှာပြင်ကြီးလာတာကြောင့် Resolution အရည်အသွေးကို QuadHD (2560x1440 pixels) အထိ မြင်တွေ့ရမှာဖြစ်ပြီး၊ Samsung မော်ဒယ်မြင့်ဖုန်းတွေထုံးစံအတိုင်း SuperAMOLED Display နဲ့ ဖြစ်ပါတယ်။

                နောက်ထပ်အချက်အလက်တွေကတော့ 12MP ကျောကင်မရာဆန်ဆာ၊ 8MP ရှေ့ကင်မရာတို့ ပါဝင်မှာဖြစ်ပြီး၊ တခြားပြိုင်ဘက်ဖုန်းတွေလို ကျောကင်မရာနှစ်လုံးမသုံးထားတာကတော့ စိတ်ဝင်စားစရာပါ။ ဒီ့အပြင် နောက်ထပ်စိတ်ဝင်စားဖို့ကောင်းတာတစ်ခုက Note 7 ဖုန်းမှာပါခဲ့တဲ့ Iris Scanner (မျက်ဝန်းဖတ်စကန်နာ) ကို S8 မှာ ပြန်သုံးထားတာတွေ့ရပါတယ်။

                ရေနဲ့ဖုန်မှုန့်စိမ့်ဝင်မှုကနေကာကွယ်နိုင်မှုအဆင့်သတ်မှတ်ချက် IP 68 ၊ Samsung Knox လုံခြုံရေးစနစ်၊ Samsung Pay မိုဘိုင်းငွေချေမှုစနစ်၊ ကြိုးမဲ့အားသွင်းစနစ်နဲ့ 4GB RAM တို့လည်း S8 ဖုန်းမှာ ပါဝင်လာဖွယ်ရှိပြီး၊ အနိမ့်ဆုံး Storage ကို 64GB အထိ ထားထားတာတွေ့ရပါတယ်။

                Samsung ဖုန်းပရိတ်သတ်တွေအကြိုက်တွေ့မယ့်နောက်ဆုံးတစ်ခုကတော့ အသံပိုင်းဆိုင်ရာမှာနာမည်ကြီး Brand တစ်ခုဖြစ်တဲ့ AKG အမှတ်တံဆိပ်နားကြပ်တွေလည်း S8 ဖုန်းမှာ တပါတည်းပါဝင်လာမှာဖြစ်တယ်လို့ ဆိုပါတယ်။