Galaxy C7 Pro ဖုန်းထွက်ရှိပြီးနှစ်လအကြာမှာ၊ C စီးရီးရဲ့ နောက်ထပ်စမတ်ဖုန်းအသစ်ဖြစ်တဲ့ Galaxy C5 Pro ကို ထပ်မံထွက်ရှိလာပါပြီ။

                Galaxy C7 Pro ဖုန်းတုန်းကလိုပဲ၊ C5 Pro ကို Lake Blue အပြာရောင်၊ Maple Leaf ရွှေရောင်နဲ့ Rose Powder ပန်းရောင်ဆိုပြီး သုံးမျိုးရရှိမှာပါ။ စျေးနှုန်းက တရုတ်ယွမ်ငွေ ၂၄၉၉ ( ၃၆၀ ဒေါ်လာ) ခန့်ရှိပြီး၊ မတ်လ ၁၆ ရက်ကနေ စတင်ကာ တရုတ်နိုင်ငံတွင်း ဝယ်ယူနိုင်ပြီလို့ သိရပါတယ်။

                C5 Pro ဟာ တကယ်တမ်းတော့ C7 Pro အသေးစားဖြစ်ပြီး၊ မျက်နှာပြင်အကျယ်က ၅.၂ လက်မပဲရှိပါတယ်။ Resolution ကတော့ Full-HD (1080 x 1920 pixels) ဖြစ်ပြီး၊ Samsung ဖုန်းတွေထုံးစံအတိုင်း Super AMOLED Display နဲ့ပါပဲ။ ကိုယ်ထည်က သတ္တုကိုယ်ထည်ဖြစ်ပြီး၊ Antenna လိုင်းတွေက ဖုန်းအပေါ်ဘက်နဲ့ အောက်ဘက်မှာ ပါရှိပါတယ်။ အရင် A စီးရီး (2016) နဲ့ အရင် C စီးရီးဖုန်းတွေနဲ့ ဒီဇိုင်းကွာတာဆိုလို့  ဖုန်းထောင့်လေးတွေက အနည်းငယ်ပိုကွေးသွားပြီး၊ လေးထောင့်ကျကျမဟုတ်တော့တာပဲ ကွာပါမယ်။

                လက်ဗွေရာဆန်ဆာက Home ခလုတ်မှာပဲဖြစ်ပြီး၊ USB Type-C port ၊ 3.5mm Audio Jack ပေါက်တို့က ဖုန်းအောက်ဘက်မှာပါရှိပါတယ်။ အသံအတိုးအချဲ့ခလုတ်ကတော့ ဖုန်းရဲ့ ဘေးဘက်မှာဖြစ်ပြီး၊ ပါဝါခလုတ်က ဖုန်းညာဘက်မှာပါ။

                Galaxy C5 Pro ရဲ့ Specifications ကတော့ Snapdragon 625 octa-core processor ၊ 4GB RAM နဲ့ 64 GB Storage တို့ပါရှိပြီး၊ nano dual SIM ဖြစ်ပါတယ်။ SIM တစ်ကတ်နေရာမှာ microSD ကတ် slot လည်း အသုံးပြုနိုင်ပြီး၊ 256GB အထိ ထပ်စိုက်နိုင်ပါတယ်။ 

                ကင်မရာပိုင်းမှာတော့ f/1.9 အထိဖွင့်နိုင်တဲ့ Flash မီးနှစ်လုံးပါ 16-MP ကျောကင်မရာပါရှိပြီး၊ ရှေ့ကင်မရာကလည်း 16MP ပါပဲ။ ဘက်ထရီက 2600mAh ဘက်ထရီဆိုတော့ ဘက်ထရီနည်းတယ်လို့ ထင်ရပေမယ့်၊ ဘာမှမသုံးဘဲဖွင့်ထားမယ်ဆိုရင် ၂၉၆ နာရီတိတိခံတယ်လို့ ဆိုပါတယ်။ စျေးအလယ်အလတ်လောက်ရှိတဲ့ Mid-range ဖုန်းတစ်လုံးဖြစ်ပေမယ့်၊ မော်ဒယ်မြင့်ဖုန်းတွေမှာပဲ အတွေ့များတဲ့ NFC ၊ USB Type-C တို့လည်း ပါဝင်တာကို တွေ့ရပါတယ်။

                အသုံးဝင်တဲ့ Sensor တွေဖြစ်တဲ့ Acceleration sensor, gyroscope, magnetometer, proximity sensor နဲ့ RGB Light sensor တို့ အကုန်ပါဝင်မှာပါ။ Android စနစ်ကတော့ နောက်ဆုံးထွက်ဖုန်းဆိုပေမယ့်၊ Nougat မဟုတ်ဘဲ 6.0.1 Marshmallow နဲ့ပဲ ဖြစ်ပါတယ်။