Internet ဆိုတာ အယုံလွယ်တတ်တဲ့ User တွေအတွက်တော့ တကယ့်ကိုကြောက်စရာကောင်းတဲ့နေရာတစ်ခုလို့ ဆိုရမှာပါ။ “မင်းကွန်ပြူတာမှာဗိုင်းရပ်စ်တွေဝင်နေပြီ၊ ငါတို့ဆော့ဖ်ဝဲလေးနဲ့ သတ်လိုက်ပါဦး” ဆိုပြီး သူ့ဆော့ဖ်ဝဲကိုယ်တိုင်က “ဂျင်း” ဖြစ်နေတတ်ပါတယ်။

                အခုအသစ်ပေါ်လာတဲ့ Malware တစ်ခုကလည်း ဒီလိုအယုံလွယ်တတ်တဲ့သူတွေကို အဓိကပစ်မှတ်ထားပြီး၊ Windows အပြင် macOS က User တွေကိုပါ တိုက်ခိုက်နိုင်စွမ်းရှိတယ်လို့ သိရပါတယ်။

                NeoSmart Technologies ဆော့ဖ်ဝဲကုမ္ပဏီကနေ စတင်တွေ့ရှိခဲ့တဲ့ အဆိုပါ Malware ကို “Font wasn’t found” လို့ အမည်ပေးထားပြီး၊ သူတိုက်ခိုက်တဲ့ပုံစံက Chrome pop-up တစ်ခုအသွင်နဲ့ဖြစ်ပါတယ်။ ဒီ Malware ရှိနေတဲ့ ဝဘ်ဆိုဒ်တွေကို ဝင်ကြည့်တဲ့သူတွေကို ပေါက်ကရစာလုံးပုံစံတွေ အရင်ပြမှာဖြစ်ပြီး၊ ထို့နောက် Chrome ကပဲ လိုနေတဲ့ Font တွေကို Install လုပ်မလားလို့ Pop-up တက်လာသယောင် ဟန်ဆောင်ကာ တိုက်ခိုက်ပါတယ်။

                အောက်မှာမြင်တွေ့ရတဲ့ပုံစံကတော့ ယခု Malware တိုက်ခိုက်တဲ့ပုံစံဖြစ်ပြီး၊ “Chrome Font Pack” ဗားရှင်းအတုတစ်ခုကို ဖော်ပြကာ၊ Update လုပ်ခိုင်းနေတာဖြစ်ပါတယ်။ Update လုပ်လိုက်ပြီဆိုရင် Application Installer တစ်ခုကို ဒေါင်းလုဒ်ဆွဲတော့မှာပါ။

                အကယ်လို့ Install လုပ်လိုက်ပြီဆိုရင် ဒီ Malware က သင့်ကွန်ပြူတာကို ဘယ်လိုအန္တရာယ်ပေးနိုင်သလဲဆိုတာ အခုအချိန်ထိ အတိအကျမသိရသေးပါဘူး။ လက်ရှိရရှိထားတဲ့သတင်းအချက်အလက်တွေအရ Chrome ကော Windows Defender ကောကပါ ဒီ Malware ကို အန္တရာယ်ရှိပရိုဂရမ်တစ်ခုလို့ မသိသေးဘဲ၊ တစ်ချို့ Anti-Virus ဆော့ဖ်ဝဲတွေပဲ သတိပေး၊ ဖယ်ထုတ်ပစ်နိုင်ခဲ့တယ်လို့ 9to5Google ဝဘ်ဆိုဒ်မှာ ဖော်ပြထားပါတယ်။